រាជធានីភ្នំពេញ៖ ក្រោយប្រកួតអស់រយៈពេល៤ថ្ងៃរួមមក ក្លិបកីឡាការ៉ាតេក្រសួងការពារជាតិ បានគ្រោងជើងឯក ឆ្នាំ២០២២ ក្នុងការប្រកួតកីឡាជើងឯកថ្នាក់ជាតិប្រចាំឆ្នាំ នៅក្នុងសាលដំបូលទូកក្នុងសកលវិទ្យាល័យភូមិន្ទភ្នំពេញ កាលពីថ្ងៃអាទិត្យកន្លងមកថ្មីៗនេះ។ ខណៈដែលសួងការពារជាតិ ទទួលបានមេដាយសរុបចំនួន ១៨ ក្នុងនោះ មានមេដាយមាសចំនួន ១០ ប្រាក់ចំនួន៤ និងសំរឹទ្ធចំនួន ៤។
ការប្រកួតថ្នាក់ជាតិប្រចាំឆ្នាំនេះ មានក្លិបចូលរួមប្រកួតចំនួន ២១ក្លិប ដោយមានកីឡាករ ចាប់ពីកុមារ រហូតដល់មនុស្សពេញវ័យ ហើយក្លិបក្រសួងការពារជាតិគឺជាអ្នកទទួលជ័យជម្នះ ដោយទទួលបានមេដាយច្រើនជាងគេ។
ក្លិបដែលទទួលបានចំណាត់ថ្នាក់លេខ២ គឺក្លិបរបស់ក្រសួងសេដ្ឋកិច្ច និងហិរញ្ញវត្ថុ ដោយទទួលបានមេដាយសរុបចំនួន១៤ ក្នុងនោះមានមេដាយមាសចំនួន ៧ ប្រាក់ ១ និងសំរឹទ្ធចំនួន៦។ ចំណែកឯចំណាត់ថ្នាក់លេខ៣គឺក្លិបការ៉ាតេដូ ហនុមាន ដោយទទួលបានមេដាយសរុបចំនួន ២៣ ក្នុងនោះមេដាយមាសចំនួន ៦ ប្រាក់១០ និងសំរឹទ្ធចំនួន ៧។
ក្នុងឱកាសបិទបញ្ចប់នេះ លោក សាមឺឌី ស៊ីវឌ្ឍនា អនុប្រធានទី៣ សហព័ន្ធកីឡាការ៉ាតេអាស៊ីអាគ្នេយ៍ និងជាអនុប្រធានសហព័ន្ធកីឡាការ៉ាតេកម្ពុជា មានប្រសាសន៍ ចាត់ទុកការចូលរួមយ៉ាងផុសផុលក្នុងការប្រកួតជើងឯកថ្នាក់ជាតិ ឆ្នាំ២០២២ គឺជាសក្ខីភាពមួយទៀត នៃគ្រួសារការ៉ាតេកម្ពុជា ក្នុងយុទ្ធនាការ «កីឡារស់ក្នុងសន្ដិភាព»។ លោកក៍បានកោតសរសើរ និងវាយតម្លៃខ្ពស់ ចំពោះគណៈកម្មការរៀបចំ ដែលជំរុញព្រឹត្តិការណ៍នេះ បញ្ចប់ដោយជោគជ័យ ពិសេសការចូលរួមយ៉ាងផុសផុលរបស់បណ្ដាសមាគម/ក្លិប និងសាលាគុននានា ក្នុងការលើកកម្ពស់ការយល់ដឹងពីតម្លៃកីឡាផង និងបេសកកម្មលើកស្ទួយវិស័យកីឡាការ៉ាតេកម្ពុជាផង។
លោកបន្ដថា «ការប្រកួតជ្រើសរើសជើងឯកកីឡាការ៉ាតេថ្នាក់ជាតិប្រចាំឆ្នាំ២០២២ នេះ ក៏ជាសក្ខីភាព នៃស្មារតីសហការខ្ពស់ ពីគ្រប់មជ្ឈដ្ឋាន នៃគ្រួសារការ៉ាតេ ក្នុងយុទ្ធនាការជាតិ ស្ដីពីការផ្សព្វពផ្សាយលើប្រធានបទ «កីឡារស់ក្នុងសន្ដិភាព» ផងដែរ»។
បន្ថែមលើកនេះ លោកបានផ្ដាំផ្ញើ និងជំរុញឲ្យកីឡាករ-កីឡាការិនី ក៏ដូចជាថ្នាលទាំងអស់ ត្រូវបន្ដខិតខំស្វែងយល់បន្ថែមទៀត លើបច្ចេកទេស ដើម្បីលើកកម្ពស់សមត្ថភាព ក្នុងការដណ្ដើមជយលាភី លើកកម្ពស់កេរ្ដិ៍ឈ្មោះ និងកិត្តិយសជូនក្លិប និងប្រទេសជាតិ ពិសេសការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា ដែលនៅសល់ពេលជាង ៨០ថ្ងៃទៀតតែម្ដង៕
