រាជធានីភ្នំពេញៈ ការប្រកួតបាល់ទះ ដណ្ដើមពាន Slamball ដែលមានទឹកប្រាក់២០ លានរៀល ដែលបានធ្វើការប្រកួតជម្រុះរយៈពេល ៣ខែ និងធ្វើដំណើរ៨ខេត្ដក្រុងនោះ បានបញ្ចប់ដោយជោកជ័យកាលពីអាទិត្យមុននោះ ត្រូវបានអគ្គលេខាធិការកីឡាមួយនេះ ចាត់ទុកជាការព្រឹត្តិការណ៍ប្រកួតដ៍អស្ចារ្យ ដែលប្រើច្បាប់តាមស្ដង់ដាសហព័ន្ធទាំងអស់។
អគ្គលេខាធិការសហព័ន្ធកីឡាបាល់ទះកម្ពុជាបានលោក អាំង សិ រីពិសិដ្ឋ បានឱ្យដឹងថា៖ «ព្រឹត្តិការណ៍ Slamball នេះ ក៏ជាការរួមចំណែកមួយ ក្នុងការជំរុញការវិវឌ្ឍថ្មីនៃវិស័យបាល់ទះនៅកម្ពុជា »។ ជាមួយគ្នា នេះ សហព័ន្ធកីឡាបាល់ទះកម្ពុជា ក៏បានពង្រឹងលើមន្ត្រីបច្ចេកទេស ដោយថ្មីៗនេះបានបើកវគ្គបណ្តុះបណ្តាលការគ្រប់គ្រងប្រព័ន្ធ Volleyball Information System និង EScoresheet Computer Program ដើម្បីឈានទៅរកកម្រិតអន្តរជាតិ។
លោកបន្តថា៖ «ខ្ញុំចាំបានថា ពីមុនឱ្យតែមានព្រឹត្តិការណ៍ប្រកួត តែងតែមានការជះឥទ្ធិពលទៅលើអាជ្ញាកណ្តាល ដោយពេលខ្លះគាត់មានការភ្លាំង ភ្លាត់ ហើយពេលខ្លះ គាត់កាត់សេចក្តីត្រូវហើយ តែកីឡាករខ្លួនឯងទេ ដែលមិនទទួលយកលទ្ធផលការកាត់សេចក្តីនោះ ប៉ុន្តែបន្ទាប់ពីការកំណែទម្រង់នេះ ឃើញថា អាជ្ញាកណ្តាលយើងសុក្រឹតមែនទែន»។ «អាជ្ញាកណ្តាលដែលមកកាត់សេចក្តីក្នុងព្រឹត្តិការណ៍នានា ជាពិសេសការប្រកួត Slamball នេះគឺអាជ្ញា កណ្តាលមកពីសហព័ន្ធកីឡាបាល់ទះកម្ពុជា ដែលត្រូវបានបំពាក់បំប៉នយ៉ាងគត់មត់ និងមានអាជ្ញាប័ណ្ណត្រឹមត្រូវ»។
ទន្ទឹមនឹងនេះ សហព័ន្ធកីឡាបាល់ទះកម្ពុជា ក៏បានកំណត់ឱ្យក្រុមបាល់ទះទាំងអស់នៅកម្ពុជាចុះបញ្ជីផងដែរ ព្រោះក្រុមមិនចុះបញ្ជីជាមួយសហព័ន្ធនឹងមិនត្រូវបានអនុញ្ញាតឱ្យចូលរួមប្រកួតក្នុងព្រឹត្តិការណ៍ធំៗទេ ។
លោក អាំង សិរីពិសិដ្ឋ ថា៖ «នេះជាបទបញ្ជា ដែលយើងបានបង្កើត និងត្រូវអនុវត្តទាំងអស់គ្នា ហើយយើងឃើញថាមកដល់ពេលនេះ មានក្រុមតំណាងក្លិបតាមរាជធានីខេត្តបានមកចុះបញ្ជីជាង ៣០ ហើយ
គួរំលឹកផងដែរថា៖ ការប្រកួតផ្តាច់ព្រ័ត្រ កាលពីសប្ដាហ៍កន្លងមក ក្រុមពង្រូលកំពង់ស្ពឺ បានយកឈ្នះក្រុមត្រីឆ្លាំងភ្នំពេញ ដោយលទ្ធផល ៣ សិតទល់នឹង ២ សិត (៣២) ដើម្បីក្លាយជាជើងឯក អមដោយប្រាក់រង្វាន់ ២០ លានរៀល និងក្រុមត្រីឆ្លាំងភ្នំពេញ បាន ១២ លានរៀល។ រីឯក្រុមលេខ ៣ បានទៅលើក្រុមដំរីសៀមរាប ដែលបានប្រាក់ ៦ លានរៀល៕
