រាជធានីភ្នំពេញ៖ លោក Oliver Scheer ជំនាញការមកពីស្ថាប័នអត្តពលកម្មពិភពលោក (World Athletics) បានវាយតម្លៃខ្ពស់ ចំពោះការឆ្លៀតពេលដ៏មមាញឹករបស់សហព័ន្ធខ្មែរកីឡាអត្តពលកម្ម កំឡុងពេលត្រៀមរៀបចំស៊ីហ្គេម ឆ្នាំ២០២៣ ដើម្បីសហការរៀបចំគម្រោងសាមគ្គីអូឡាំពិក ស្តីពីការអភិវឌ្ឍប្រព័ន្ធកីឡាជាតិ សម្រាប់កីឡាអត្តពលកម្ម។ លោករំពឹងថា សហព័ន្ធ នឹងអាចឈរចំណាត់ថ្នាក់ពីលេខ៦ ដល់លេខ៨ (Top6 ទៅ Top8) ក្នុងតំបន់អាស៊ាន នាថ្ងៃអនាគត បន្ទាប់ពីអនុវត្តនូវគម្រោងនេះ។
ការបង្ហាញសុទិដ្ឋិនិយមរបស់អ្នកជំនាញអន្ដរជាតិរូបនេះ បានធ្វើឡើងក្នុងសន្និសីទសារព័ត៌មាន ស្ដីពីគម្រោងខាងលើ បន្ទាប់ពីលោក Oliver Scheer បានធ្វើទស្សនកិច្ចលើកទី២ មកកម្ពុជា ចាប់ពីថ្ងៃទី២៦ ដល់ថ្ងៃទី៣១ ខែមករា ឆ្នាំ២០២៣ ក្នុងគោលបំណង ដើម្បីរៀបចំសិក្ខាសាលា ស្តីពីការវាយតម្លៃរចនាសម្ព័ន្ធ/យុទ្ធសាស្ត្រគម្រោង និងរៀបចំប្រព័ន្ធនៃការបង្វឹក ដោយសហការជាមួយសហព័ន្ធ។ គម្រោងនេះ មានរយៈពេល ១ឆ្នាំ គិតចាប់ពីខែសីហា ឆ្នាំ២០២២ ដល់ចុងខែកក្កដា ឆ្នាំ២០២៣ ដែលឧបត្ថម្ភដោយអង្គការសាមគ្គីអូឡាំពិក។
លោកបានគូសបញ្ជាក់ថា សហព័ន្ធខ្មែរកីឡាអត្តពលកម្ម បានសហការរៀបចំយ៉ាងល្អ ក្នុងគម្រោងនេះ ដែលធ្វើឱ្យមានវឌ្ឍនភាពល្អ ទោះបីមានការយឺតយ៉ាវបន្ដិចបន្ដួច ដោយសារការរៀបចំមហាសន្និបាតជ្រើសរើសគណៈកម្មាធិការប្រតិបត្តិអាណត្តិថ្មីក៏ដោយ។ ជារួមដំណើរទស្សនកិច្ចលើកទី២នេះ លោកមើលឃើញការចូលរួមរបស់ថ្នាក់ដឹកនាំ និងមន្ដ្រីបច្ចេកទេសកម្ពុជាកាន់តែផុសផុល។ ទោះបីនៅមានបញ្ហាខ្លះ តែលោកនឹងព្យាយាមលើកបញ្ហានោះ ដើម្បីដោះស្រាយឱ្យបានប្រសើរ និងជំរុញសហព័ន្ធ ឆ្ពោះទៅរកការអភិវឌ្ឍស្របតាមស្ដង់ដាអន្ដរជាតិ។
បុរសជនជាតិអូទ្រីសរូបនេះ បានបញ្ជាក់ថា៖ «ខ្ញុំសង្ឃឹមថា បន្ទាប់ពីអនុវត្តគម្រោងនេះ សហព័ន្ធ នឹងទទួលបានចំណាត់ថ្នាក់ទី៥ ក្នុងចំណោមសហព័ន្ធកីឡាជាតិទាំងអស់ ក្នុងនាមសហព័ន្ធ ដែលមានការគ្រប់គ្រងអភិបាលកិច្ច និងការរៀបចំប្រព័ន្ធគ្រប់គ្រងសហព័ន្ធគ្រប់ជ្រុងជ្រោយ ហើយខ្ញុំក៏ជឿថា សហព័ន្ធ នឹងអាចឈានដល់កម្រិតពីចំណាត់ថ្នាក់ ចន្លោះលេខ៦ ទៅលេខ ៨ ក្នុងតំបន់អាស៊ាន ដើម្បីជាការអភិវឌ្ឍបន្ដទៀតផងដែរ»។ ការបង្ហាញសុទិដ្ឋិនិយមនេះ ដោយសារលោកមើលឃើញការខំប្រឹង និងទិសដៅដ៏ច្បាស់លាស់របស់សហព័ន្ធខ្មែរកីឡាអត្តពលកម្ម។
ដោយឡែកលោក ប៊ុយ សុភ័ណ្ឌ ទីប្រឹក្សាគណៈកម្មាធិការជាតិអូឡាំពិកកម្ពុជា បានលើកឡើងថា គម្រោងនេះ គឺមានសារៈសំខាន់ណាស់ មិនត្រឹមតែសហព័ន្ធខ្មែរកីឡាអត្តពលកម្មនោះទេ គឺផ្ដល់អត្ថប្រយោជន៍ជារួម ដែលសហព័ន្ធកីឡាជាតិដទៃ ក៏អាចយកទៅអនុវត្ត ដើម្បីធានាបាននូវការរៀបចំរចនាសម្ព័ន្ធ/យុទ្ធសាស្ដ្រគ្រប់គ្រង ដឹកនាំ និងអភិវឌ្ឍកីឡានីមួយៗ ឱ្យកាន់តែរីកចម្រើន ស្របតាមគោលការណ៍កីឡាអន្ដរជាតិ ដ្បិតគម្រោងនេះ មានការទទួលស្គាល់ដោយអន្ដរជាតិ។ លើសពីនេះ NOCC ក៏គ្រោងនឹងស្នើសុំអង្គការសាមគ្គីអូឡាំពិក ដើម្បីរៀបចំគម្រោងបែបនេះ ដល់សហព័ន្ធកីឡាផ្សេងៗទៀតផងដែរ៕
