រាជធានីភ្នំពេញ៖បន្ទាប់ពីបញ្ចប់ការប្រកួតជ្រើសរើសជើងឯកថ្នាក់ជាតិឆ្នាំ២០២២កាលពីពេលថ្មីៗនេះរួចមក សហព័ន្ធកីឡាប្រដាល់សកលកម្ពុជា បានសង្កេតឃើញមានការកើនឡើង ទាំងបរិមាណ និងសមត្ថភាព បច្ចេកទេសរបស់កីឡាករ-កីឡាការិនីចូលរួម ។ នេះបើតាមការបញ្ជាក់របស់លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា។
លោក ប៊ុយ សុភ័ណ្ឌ បន្ថែមថា «មូលហេតុនៃការកើនឡើងសមត្ថភាព និងកម្រិតបច្ចេកទេសរបស់កីឡាករ-កីឡាការិនី គឺស្របតាមការអនុវត្តយុទ្ធសាស្ដ្រអភិវឌ្ឍន៍ធនធានកីឡាករ-កីឡាការិនី ឈានឆ្ពោះទៅទទួលបានជោគជ័យ សម្រាប់ការប្រកួតកីឡាស៊ីហ្គេម ឆ្នាំ២០២៣ នាពេលដ៏ខ្លីខាងមុខ ។ ម្យ៉ាងវិញទៀត សហព័ន្ធអាចវាយតម្លៃបានថា គណៈកម្មការបច្ចេកទេស មន្ដ្រីអាជ្ញាកណ្ដាល-ចៅក្រម ក៏មានសមត្ថភាពគ្រប់គ្រាន់ក្នុងការចូលរួមរៀបចំការប្រកួតកីឡាស៊ីហ្គេម នាឆ្នាំក្រោយផងដែរ» ។
ជាមួយគ្នានោះ លោកសាស្ដ្រាចារ្យវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធ បានថ្លែងអំណរគុណក្រសួងអប់រំ យុវជន និងកីឡា ក៏ដូចជាគ្រប់ភាគីពាក់ព័ន្ធ ដែលតែងគាំទ្រ និងចូលរួមព្រឹត្តិការណ៍ប្រចាំឆ្នាំនេះ ក្នុងន័យដើម្បីដកស្រង់ វាស់ស្ទង់ និងបង្កើនសមត្ថភាព បច្ចេកទេស របស់កីឡាករ-កីឡាការិនី ពិសេសក្រុមជម្រើសជាតិ ឆ្ពោះទៅរកការអភិវឌ្ឍសមត្ថភាពកម្រិតខ្ពស់ និងត្រៀមព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជា នាឆ្នាំ២០២៣ ខាងមុខ ។
ក្រឡេកមកចាប់អារម្មណ៍លទ្ធផលបច្ចេកទេស ក្នុងព្រឹត្តិការណ៍ជើងឯកថ្នាក់ជាតិនេះវិញ គឺក្រុមក្រសួងមហាផ្ទៃ ដណ្ដើមបានមេដាយច្រើនជាងគេសរុប ៩គ្រឿង (មាស ៣ ប្រាក់ ៤ និងសំរឹទ្ធ ២) គ្រាដែលក្លិបប្រដាល់អារុណរៈខេត្តកណ្ដាល ឈរលេខ២ ឈ្នះមេដាយសរុប ៨គ្រឿង(មាស ២ ប្រាក់ ៤ និងសំរឹទ្ធ២) ។ រីឯរាជធានីភ្នំពេញ និងក្រសួងសេដ្ឋកិច្ច និងហិរញ្ញវត្ថុ ដណ្ដើមបានមេដាយមាស ២គ្រឿងស្មើគ្នា ឈរលេខ៣ និងលេខ៤ ខណៈក្លិបសរសីកីឡា ឈ្នះមេដាយមាស ១ និងសំរឹទ្ធ ១ ឈរលេខ៥ និងក្រសួងការពារជាតិ ដណ្ដើមបានមេដាយមាស ១ ឈរលេខ៦ ៕
