ខេត្តកំពង់ស្ពឺ ៖ រណ្តៅដីមានជម្រៅ គួរអោយខ្លាច របស់លោកសំណាងមួយកន្លែង ស្ថិតនៅជាប់នឹងផ្លូវលេខ១២៩ ស្ថិតនៅក្នុងឃុំចាន់សែន ភូមិទំនប់ទឹក ស្រុកឧត្តុង្គ ខេត្តកំពង់ស្ពឺ កំពុងធ្វើឲ្យ ប្រជាពលរដ្ឋក្នុងមូលដ្ឋានមានការព្រួយបារម្ភយ៉ាងខ្លាំងនូវបញ្ហាប្រឈមនឹងគ្រោះថ្នាក់ដោយ យកថាហេតុផ្សេងៗទៅថ្ងៃមុខ ព្រោះតែរណ្តៅដីមួយនេះមានជម្រៅជ្រៅមហាសែនជ្រៅមើលពីលើទៅឃើញគ្រឿងចក្រ និងឡានដឹកដីតូចៗប៉ុនមេដៃ។
ប្រជាពលរដ្ឋ បានលើកឡើងថា ទោះបីជារណ្តៅដីរបស់លោកសំណាង នេះមានជម្រៅជ្រៅ មិនដឹងថា អាជ្ញាធរ និង មន្ត្រីជំនាញ មានទទួលជ្រាប ពីមុខជំនួញ របស់ថៅកែរណ្តៅដី មួយកន្លែងនេះទេ ព្រោះថា រណ្តៅដីធំហើយ ជ្រៅ ម៉្យាង គឺស្ថិតនៅជាប់ ជាមួយនឹងផ្លូវកៅស៊ូទៀត។
ប្រភពព័ត៌មានបានឲ្យដឹងថា បើតាមផ្លូវច្បាប់កំណត់ឲ្យជីករណ្តៅដីនេះជម្រៅត្រឹមតែ៥ម៉ែត្រទេ ប៉ុន្តែរណ្តៅដីរបស់លោកសំណាង នេះជីករហូតដល់ទៅប្រហែលជាង១០ម៉ែត្រ ឯណោះ ដែលធ្វើឲ្យប្រជាកសិករមានដីស្រែបន្តិចបន្តួចនៅជុំវិញក្បែររណ្តៅដីនោះ គ្រាន់ធ្វើស្រូវចិញ្ចឹមជីវិតមានការព្រួយបារម្ភនាពេលរដូវវស្សា ភ្លៀង ធ្លាក់បណ្តាលឲ្យហូរ ច្រោះបាក់ច្រាំងប៉ះពាល់ដល់ដីស្រែរបស់ពួកគាត់ តើអ្នកណាជាអ្នកទទួលខុសត្រូវ ជាពិសេសខ្លាចមានគ្រោះថ្នាក់ដល់អាយុជីវិត សត្វពាហនៈ និងកូនក្មេងតូចៗ របស់ប្រជាពលរដ្ឋដើរឃ្វាលគោក្របីធ្លាក់ចូលរណ្តៅដីមរណៈនេះ ពីព្រោះរណ្តៅដីនេះមិនមានធ្វើរបងបាំងនោះទេ។
ប្រពភព័ត៌មានពីប្រជាពលរដ្ឋដែលរស់នៅក្បែររណ្តៅដីនេះបានឲ្យដឹងទៀតថា រណ្តៅដីនេះគឺម្ចាស់ទីតាំងដែលកាយយកអាចម៌ដី នេះ មាន ឈ្មោះ សំណាង គឺចាប់ផ្តើមកាយយកដីលក់នេះចាប់តាំងពីឆ្នាំ២០២០មកម៉្លេះ ហើយក៏មិនដឹងថាគេជីកដល់ជំរៅប៉ុណ្ណានោះទេ ហើយកាយដល់ឆ្នាំណាទើបឈប់កាយយកដីលក់នោះទេ។ដោយឡែកបើនិយាយពីផលប៉ះពាល់វិញ ក្រុមឡានដឹកដីរបស់ពួកគេ បានចាប់ផ្តើមដឹកតាំងពីម៉ោង៤-៥ភ្លឺ រហូតដល់ម៉ោង ៩យប់ ដឹកតាមបណ្តាលផ្លូវជាតិលេខ១២៩នេះខូចខាតដោយអន្លើរៗហើយ។
ជាការសំណូមពររបស់ប្រជាពលរដ្ឋស្នើរអោយក្រសួងរ៉ែ និងថាមពលមេត្តាចុះពិនិត្យមើលការជីកដីរបស់ពួកគេផង ព្រោះថា បើមើលទំហំ និងជម្រៅវាសឹងស្មើ កូនសមុទ្រមួយទៅហើយ។ ប្រជាពលរដ្ឋមានការងឿងឆ្ងល់ថាហេតុអ្វីរណ្តៅដីមួយនេះនៅជាប់នឹងផ្លូវកៅស៊ូហើយគ្មានបាំងរបងនោះទេហេតុអ្វីអាជ្ញាធរមើលមិនឃើញ រឺមួយបានទទួលសំណែនពីថៅកែរណ្តៅដីនោះហើយទេដឹង បានជាបណ្តែតបណ្តោយ ឲ្យដល់ថ្នាក់នេះ។
សូមបញ្ជាក់ផងដែរថា ពាក់ព័ន្ធនឹងករណីរណ្តៅដីនេះយើងមិនអាចទំនាក់ទំនងទៅលោកសំណាង ម្ចាស់ រណ្តៅដីនេះ និងអាជ្ញាធរពាក់ព័ន្ធបានទេដោយសារក្រុមការងារយើងមិនមានលេខទូរស័ព្ទ ៕
