ប្រធានក្លិបបាល់ទាត់ Khmer United គ្រោងចំណាយរៀបចំការប្រកួត KW Cambodia Leagueឱ្យធំជាមុន នៅលើកក្រោយ

រាជធានីភ្នំពេញ៖ ក្រោយពីជោកជ័យ និង ទទួលបានការគាំទ្រច្រើនពីសំណាក់យុវជនក្នុងការៀបចំ ការប្រកួតបាល់ទាត់ដណ្ដើមពានរង្វាន់ពាក់កណ្ដាលអាជីពដ៏ធំ KW Cambodia League រដូវកាលទី១០ ឆ្នាំ២០២២ ដែលបានបញ្ចប់កាលពីថ្ងៃទី ២៣ ខែតុលា ម្សិលមិញនោះ លោកឧកញ៉ាបណ្ឌិត គីម ហ៊ាង ប្រធាន KW Cambodia និងជាស្ថាបនិកពានរង្វាន់ KW Cambodia League គ្រោងចំណាយប្រាក់រៀបចំការប្រកួតនេះម្ដងទៀត ឲ្យកាន់តែធំជាងមុននៅលើកក្រោយ។ក្នុងនាមប្រធានក្លិប Khmer United ផងដែរនោះ លោកបន្ដថា «ខ្ញុំនៅថ្លឹងថ្លែងនៅឡើយ ថាឆ្នាំ២០២២ រដូវកាលទី១០ ដែលយើងសន្យាធ្វើ ១០ឆ្នាំ គឺចប់ហើយ ។ អ៊ីចឹងឆ្នាំ២០២៣ យើងមានជម្រើស ២ ទី១-យើងបង្កើតពាន រដូវកាលទី១ បន្ដទៅមុខទៀត ហើយទី២ យើងរុញ Khmer United ចូលក្នុងលីគទី២? បើចូលក្នុងលីគទី២ យើងទៅតែឯង ប៉ុន្ដែបើយើងបន្ដធ្វើ KW Cambodia League គឺយើងមានកីឡាកររាប់រយ រាប់ពាន់នាក់ នឹងទទួលបានផលប្រយោជន៍ ។ ខ្ញុំកំពុងថ្លឹងថ្លែង ព្រោះអីការចំណាយយើង វាមិនខុសគ្នាទេ ។ បើយើងចូលលេងលីគទី២ ក៏មួយឆ្នាំការចំណាយប្រហែល ១០ម៉ឺនដុល្លារដែរ ហើយបើយើងធ្វើពាន ឆ្នាំនេះក៏យើងចាយ ៧ម៉ឺនដុល្លារ ។ ឆ្នាំក្រោយបើយើងធ្វើពាន ការចំណាយអាចនឹងលើស ៧ម៉ឺន ។ ចឹងមានន័យថា ចំណាយប្រហាក់ប្រហែលគ្នា តែអ្វីដែលបានប្រយោជន៍ច្រើនជាងគេ គឺយើងបានបង្កើតពាន បានប្រយោជន៍រួម» ។

គួរំលឹកផងដែរថា ពាននេះ បានបង្កើតដំបូង កាលពីឆ្នាំ២០១២ ដោយប្រើឈ្មោះថា Khmer Real Estate League រហូតដល់ឆ្នាំ២០១៩ ទើបប្ដូរមកជាពានរង្វាន់ KW Cambodia League រហូតមកទល់បច្ចុប្បន្ន (លើកលែងឆ្នាំ២០២១ ដែលពាននេះ ពុំបានរៀបចំ ដោយសារជំងឺរាតត្បាតកូវីដ-១៩) ។
ជាមួយនឹងពិធីបិទនៃការប្រកួតនេះ ក្រោយពីក្រុមបាល់ទាត់ Khmer United បានលើកពាន KW Cambodia League អបជាមួយមេដាយមាស និង ទឹកប្រាក់ប្រមាណ ៤០លានរៀល។ ឯក្រុមបាល់ទាត់ TN កណ្ដាលដែលក្លាយជាជើងឯករងនោះ ទទួលបានប្រាក់រង្វាន់ ២០លានរៀល ។ ចំណែកក្រុមលេខ៣ បានទៅក្រុម Riel Phnom Penh ក្រោយយកឈ្នះក្រុម Marlians FC ៣-២ បានទទួលប្រាក់រង្វាន់ ១០លារៀល ខណៈក្រុមលេខ៤ Marlians FC ក៏ទទួលបានប្រាក់រង្វាន់លើកទឹកចិត្ត ៥លានរៀលផងដែរ ៕