រាជធានីភ្នំពេញ៖ ទិវារត់ប្រណាំងអន្តរជាតិ ចក្រភពខ្មែរ នៅតំបន់អង្គរខេត្តសៀមរាប ដែលគ្រោងធ្វើឡើងនាព្រឹកថ្ងៃទី៧ ខែសីហា ខាងមុខនេះ គឺជាព្រឹត្តិការណ៍កីឡាដ៍សំខាន់មួយដែលតែងប្រមូលថវិកាសម្រាប់ការបរិច្ចាគ ជូនដល់កិច្ចការសង្គម-សប្បុរសធម៌ដល់មន្ទីរពេទ្យគន្ធបុប្ជា។
ឯកឧត្តម វ៉ាត់ ចំរើន រដ្ឋលេខាធិការ ក្រសួងទេសចរណ៍ ជាអគ្គ លេខាធិការគណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍ថា៖ ព្រឹត្តិការណ៍កីឡាទេសចរណ៍រត់ប្រណាំង ប្រចាំឆ្នាំនេះត្រូវបានប្រារព្ធធ្វើឡើងជារៀងរាល់ឆ្នាំ ក្នុងគោលបំណងបង្កើនការទាក់ទាញ់ដល់ភ្ញៀវទេសចរ ជាតិ អន្តរជាតិ ហើយគ្រប់ទិវាកីឡារត់ប្រណាំងនៅកម្ពុជាទាំងអស់តែងតែធ្វើដើម្បីប្រមែ ប្រមូលថវិកា បរិច្ចាគដល់កិច្ចការសប្បុរសធម៌ ព្រមទាំងរួមចំណែកជួយដល់សង្គមជាតិរបស់យើង។ ព្រឹត្តិការណ៍នេះ មិនមែនធ្វើឡើងដើម្បីធ្វើអាជីវកម្ម ក្នុងការស្វែងរកប្រាក់ចំណេញនោះទេ ហើយការស្ម័គ្រចិត្តចូលរួមរបស់ អ្នករត់ប្រណាំងទាំងអស់ ទាំងប្រជាពលរដ្ឋខ្មែរ និងអន្តរជាតិ គឺក្នុងគោលដៅចម្បងៗ ដើម្បីជួយដល់ សប្បុរសធម៌ ហើយចំណេញទាំងសុខភាព មិត្តភាព សាមគ្គីភាព ព្រមទាំងបានចែករំលែក ពីការបង់ថ្លៃរបស់ខ្លួនជួយដល់សង្គមជាតិផងដែរ។
អ្វីដែលគោលបំណងសំខាន់មួយទៀត ទិវារត់ប្រណាំអន្តរជាតិម៉ារ៉ាតុង ចក្រភពខ្មែរ នេះក៏ជា ការផ្សព្វផ្សាយពីដំណើរឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលជាកំណត់ត្រាប្រវត្តិសាស្ត្រដំបូងរបស់ ព្រះរាជាណា ចក្រកម្ពុជាផងដែរ។ ទីតាំងតំបន់អង្គរ ខេត្តសៀមរាប ដែលជាទីលានរត់ប្រណាំងចក្រភពខ្មែរនេះ ក៏ជាកន្លែងត្រៀមរត់ប្រណាំងម៉ារ៉ាតុង ៤២,១៩៥គីឡូម៉ែត្រ សម្រាប់គោលដៅធ្វើម្ចាស់ផ្ទះ ស៊ីហ្គេម ឆ្នាំ២០២៣ផងដែរ ខណៈខេត្តសៀមរាបនឹងទទួលធ្វើម្ចាស់ផ្ទះ ស៊ីហ្គេម ឆ្នាំ២០២៣លើប្រភេទកីឡា ទោចក្រយាន មានវិញ្ញាសាកង់គួក និងកង់ភ្នំទៀតផង។
គណៈកម្មការរៀបចំទិវាម៉ារ៉ាតុងតែងតែថែរក្សាបាននូវគុណតម្លៃនៃគោលបំណងចម្បងៗទាំងអស់នេះ ហើយសម្រាប់ការរៀបចំឆ្នាំនេះ ដោយសារស្ថានភាពកូវីដ-១៩ ទើបនឹងងើបឡើងវិញ គឺមានការចុះ ឈ្មោះចូលរួមជាង ២០០០នាក់ ក្នុងនោះមានអ្នករត់បរទេសប្រមាណ ៣០០នាក់ ដែលភាគច្រើនរស់នៅ ក្នុងស្រុកស្រាប់។ ចំពោះវិញ្ញាសាដែលដាក់ឱ្យរត់ប្រណាំងមានចំនួន៤ គឺការរត់ប្រណាំងម៉ារ៉ាតុង ស្តង់ដារអន្តរជាតិ ៤២,១៩៥គីឡូម៉ែត្រ, ពាក់កណ្តាលម៉ារ៉ាតុង ២១គីឡូម៉ែត្រ, ១០គីឡូម៉ែត្រ និងរត់កម្សាន្ត លក្ខណៈគ្រួសារ ៣គីឡូម៉ែត្រ។
ជាមួយគ្នានោះ លោក សែម ផល្លា នាយកចាត់ការទូទៅទិវារត់ប្រណាំងម៉ារ៉ាតុង នៅកម្ពុជាគូស បញ្ជាក់ដែរថា សម្រាប់វិញ្ញាសា ម៉ារ៉ាតុង នឹងត្រូវចេញដំណើរនាវេលាម៉ោង ៤:៣០នាទីទាបភ្លឺ, ពាក់កណ្តាលម៉ារ៉ាតុង ៥:៤០នាទី, ១០គីឡូម៉ែត្រ ម៉ោង ៥:៥០ និងរត់កម្សាន្ត ៣គីឡូម៉ែត្រ វេលាម៉ោង ៦:០០នាទី (គម្លាត១០នាទី)។ លោកបញ្ជាក់ថា ពេលនេះគណៈកម្មការបានបិទការចុះឈ្មោះហើយ លើកលែងតែវិញ្ញាសារត់កម្សាន្តលក្ខណៈគ្រួសារប៉ុណ្ណោះ ដែលនៅបន្តទទួលចុះឈ្មោះនៅឡើយ។
នាយកចាត់ការទូទៅរូបនេះសង្កត់ធ្ងន់ថា សម្រាប់វិញ្ញាសារត់ម៉ារ៉ាតុង មានការរីកចម្រើនច្រើន ដោយសារពីដំបូងឡើយមានអ្នករត់ខ្មែរតែម្នាក់ ទៅ២នាក់ប៉ុណ្ណោះ ប៉ុន្តែពេលនេះអ្នករត់ប្រណាំងខ្មែរ មានរហូតដល់ប្រមាណ៥០ភាគរយនៃអ្នកចូលរួមរត់សរុប។ ជាមួយនឹងការរៀបចំឡើងវិញ ក្រោយខក ខានរយៈពេល២ឆ្នាំនៃវិបត្តិជំងឺកូវីដ-១៩នេះ លោក សែម ផល្លា បានចាត់ទុកថា ចំនួនអ្នកចូលរួមនេះ គឺជាភាពជោគជ័យមួយ បើទោះបីជាចំនួននេះបានធ្លាក់ចុះ ជាងទិវាចុងក្រោយ កាលពីឆ្នាំ២០១៩ក្តី ដោយសារពេលនេះគឺជាពេលវេលាស្តារឡើងវិញ។
លោកបង្ហាញក្តីរីករាយ និងអរគុណអ្នកចូលរួមរត់ប្រណាំងទាំងខ្មែរ និងអន្តរជាតិ ដែលផ្តល់ការ គាំទ្រចូលរួមចុះឈ្មោះសម្រាប់ឆ្នាំ២០២២នេះ ដើម្បីរួមគ្នាកសាងសង្គមជាតិ និងបំពេញបេសកកម្មក្នុង ការជួយដល់កិច្ចការសង្គម តាមរយៈការបង់ថ្លៃចុះឈ្មោះ និងការឧបត្ថម្ភគាំទ្រយ៉ាងពេញទំហឹងពីបណ្តា ក្រុមហ៊ុនដៃគូឯកជន និងអាជ្ញាធរខេត្តសៀមរាបផងដែរ៕
