ខេត្តសៀមរាប៖ កាលពីវេលាម៉ោង៧.៣០នាទីយប់ ថ្ងៃទី២៣ ខែមិថុនា ឆ្នាំ ២០២២ ប្រជាពលរដ្ឋដែលរស់នៅក្បែរបន្ទប់ជួលកើតហេតុបានរាយការណ៍ប្រាប់សមត្ថកិច្ចថា មានធំក្លិនស្អុយខ្លាំងណាស់ ចេញពីបន្ទប់ជួលខាងលើ ។.jpg)
ពេលដែលសមត្ថកិច្ចចុះមកដល់ បានធ្វើការគាស់ទ្វារ(ដោយសារបន្ទប់ជួលមានចាក់សោរពីក្រៅ) ចូលទៅក្នុងបន្ទប់ ក៏ប្រទះឃើញសាកសព គ្របភូយ មានលក្ខណៈហើយស្អុយរលូយទៅហើយ ។ នៅក្បែរសពនោះសមត្ថកិច្ចក៏បានឃើញយុវជនម្នាក់ដេកនៅក្បែរនោះផងដែរ ។
សមត្ថកិច្ចបានធ្វើការឃាត់ខ្លួនយុវជនខាងលើធ្វើការសាកសួរទើបដឹងថា យុវជនខាងលើបានសម្លាប់ជនរងគ្រោះដែលត្រូវជាសង្សារនឹងគ្នាពិតប្រាកដមែន ដោយបានយកខ្សែរីដូវាំងនន រឹតកជនរងគ្រោះបណ្ដាលឱ្យស្លាប់ ហើយមូលហេតុដែលឈានទៅដល់ការសម្លាប់នេះគឺកើតចេញពីភ្លើងប្រចណ្ឌ
សពមានឈ្មោះ ផា រដ្ឋា ភេទស្រី អាយុ ២៦ឆ្នាំ មុខរបរ អ្នកសាឡន ស្រុកកំណើតនៅភូមិទ័ពជ័យ ឃុំបឹងមាលា ស្រុកស្វាយលើ ខេត្ដសៀមរាប។ ចំណែកជនសង្ស័យឈ្មោះ សេង គឹម ហួរ ភេទប្រុស អាយុ ២៧ឆ្នាំ ស្រុកកំណើតនៅភូមិអញ្ចាញ សង្កាត់នគរធំ ក្រុងសៀមរាប ខេត្ដសៀមរាប ទីលំនៅបច្ចុប្បន្ន ភូមិរលួសកើត ឃុំរលួស ស្រុកប្រាសាទបាគង ខេត្ដសៀមរាប(ត្រូវជាសង្សារជនរងគ្រោះ)។
បច្ចុប្បន្នជនសង្ស័យត្រូវបានសមត្ថកិច្ចនគរបាលឃាត់យកទៅឃុំខ្លួនបណ្ដោះអាសន្នអធិការនគរបាលក្រុងសៀមរាប។ ដោយឡែកសពជនរងគ្រោះ ត្រូវបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី៕
