ខេត្តបន្ទាយមានជ័យ៖ក្រោយពីការវាយកំទេចសាលារឿនដ៏កម្សត់មួយខ្នង ស្ថិតនៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ធ្វើអោយក្មេងៗ ប្រមាណជា៣០០នាក់ ត្រូវបាត់បង់ឪកាសសិក្សារៀនសូត្រ តើអនាគតពួកគេ ទាំងអស់នឹងត្រូវទៅជាបែបណា ដោយសារតែភាពលោភលន់ ចង់បានផលប្រយោជន៍ របស់បុគ្គលមួយចំនួន បែរជាធ្វើអោយ អនាគតក្មេងៗ ដែលជាទំពាំងស្នងឫស្សី ត្រូវបាត់បង់បែបនេះ។
យោងតាមប្រសាសន៍ដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺ រាជរដ្ឋាភិបាលកំណត់យក វិស័យអប់រំ ជាគោលដៅយុទ្ធសាស្ត្រចតុកោណ របស់រាជរដ្ឋាភិបាល។ ការបំបាត់សាលារៀន មានតែនៅក្នុងរបបខ្មែរក្រហម ទេ លុះក្រោយថ្ងៃរំដោះ ៧មករា ឆ្នាំ១៩៧៩ រហូតមកដល់ពេលនេះ គឺវិស័យអប់រំបានរីកដុះដាល បណ្តុះបណ្តាលបានធន់ធានមនុស្សប្រកបដោយចំណេះដឹងយ៉ាងច្រើនជាបន្តបន្ទាប់លើគ្រប់ជំនាញ គឺកើតចេញពីការយកចិត្តទុកដាក់របស់ សម្តេចតេជោ បានកសាងសាលារៀន នៅគ្រប់មូលដ្ឋាន។
ប៉ុន្តែអ្វីដែលមិនធ្លាប់មាននោះគឺ នៅលើទឹកដី ខេត្តបន្ទាយមានជ័យ ដែលសាលារៀនមួយខ្នងមានបីបន្ទប់ ស្ថិតនៅក្នុងសហគមន៍ គង់ ជា នៅអុងម៉ុង នាភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ត្រូវបានអាជ្ញាធរមានសមត្ថកិច្ចបញ្ជាឲ្យវាយកំទេចចោល ទាំងសាលារៀនមួយខ្នងដែលជាការចូលរួមកសាងឡើងដោយកម្លាំងសាមគ្គីរបស់សហគម គង់ ជា ខាងលើ ទាំងផ្ទះបាយដែលជាការឧបត្ថម្ភសាងសង់ឡើងដោយ អង្ការក្តីស្រឡាញ់គ្មានព្រំដែន សម្រាប់ជួយឧបត្ថម្ភផ្គត់ផ្គង់អាហារមួយពេលដល់ក្មួយៗកុមារដែលបានរៀននៅក្នុងសាលាខាងលើជារៀងរាល់ថ្ងៃសិក្យា ត្រូវបានអាជ្ញាធរមានសមត្ថកិច្ចបញ្ជាឲ្យវាយកំទេចចោល ដើម្បីយកទីតាំងដីខាងលើប្រគល់ឲ្យទៅខាងភាគី កូនលោក លី អ៊ុតនី ដែលទីតាំងដីខាងលើនេះគឺភាគី អតីត លោក លី អ៊ុតនី (ស្លាប់) បានប្តឹងផ្តល់ចាញ់ក្តីខាងភាគី សហគមន៍ គង់ ជា ទាំងនៅសាលាដំបូងខេត្តបន្ទាយមានជ័យ ទាំងនៅសាលាឧទ្ធរណ៍ភ្នំពេញ ជាបន្តបន្ទាប់ ច្រើនលើកច្រើនសារ តែបែរជាអាជ្ញាធូរនៅខេត្តបន្ទាយមានជ័យ ចុះទៅយករឿងវិវាទដែលខាងតុលាការបានចេញដីកាតម្កល់រឿងទុកឥតចាត់ការលើបណ្តឹងរបស់ខាងភាគីលោក លី អ៊ុតនី ជាបន្តបន្ទាប់នោះយកមកដោះស្រាយឡើងវិញ រំលោភលើអំណាចរបស់តុលាការ ដោយកាត់ដីនៅក្នុងសហគមន៍ គង់ ជា រាប់សិបហិកតា ដោយទាំងទីតាំងដីសាលារៀន និងផ្ទះបាយដែលក្មួយៗកំពុងតែរៀន និងទទួលបានរបបឧបត្ថម្ភបាយមួយពេលជារៀងរាល់ថ្ងៃសិក្សា ពីអង្គការក្តីស្រឡាញ់គ្មានព្រំដែន នោះឲ្យទៅភាគីចាញ់ក្តីខាងកូនលោក លី អ៊ុតនី ទៅវិញ ដោយវាយកំទេចទាំងសាលារៀន ទាំងផ្ទះបាយចោល បន្សល់ទុកឲ្យក្មួយៗត្រូវបាត់បង់ឱកាសសិក្សា ព្រោះនៅតំបន់នោះសាលារៀននៅឆ្ងាយ។
ដូច្នេះរឿងហេតុខាងលើនេះ មិននឹកស្មានថា អាជ្ញាធរនៅខេត្តបន្ទាយមានជ័យ ហ៊ានធ្វើឡើងទាំងបំពាន លើអំណាចតុលាការ និងពិសេសគឺហ៊ានសម្រេចឲ្យវាយកំទេចសាលារៀនដែលក្មួយៗកំពុងតែរៀន ហើយយកទីតាំងដីនោះឲ្យទៅភាគីចាញ់ក្តីទាំងបំពានទៅវិញ (ដូចមានរូបភាពជាភស្តុតាង) ហើយហ៊ានធ្វើរបាយការណ៍រាយការជូនថ្នាក់ដឹកនាំថា ក្រុមខ្លួនបានដោះស្រាយវិវាទដ៏រ៉ាំរ៉ៃលើទីតាំងដីខាងលើទទួលបានជោគជ័យទៅវិញ។
សរុបសេចក្តីមក អ្វីដែលអាជ្ញាធរខេត្តបន្ទាយមានជ័យបានសមគំនិតគ្នាជាប្រព័ន្ធក្នុងការធ្វើរឿងខាងលើនេះ គឺពិតជាបាន បំពានសិទ្ធិអ្នកដ៏ទៃ បំភ្លៃការពិត យ៉ាងធ្ងន់ធ្ងរ។ ហើយរឿងនេះ ក្រោយពីអ្នកសារព័ត៌មានយើងផ្សព្វផ្សាយទម្លាយចេញ ដោយផ្អែកលើ ភស្តុតាងគ្រប់ជ្រុងជ្រោយហើយនោះ សង្ឃឹមថា សម្តេចតេជោ ប្រមុខរាជរាដ្ឋាភិបាល ពិតជាមិនអាចលើកលែងដល់ក្រុមបុគ្គលដែលរួមគ្នាជាប្រព័ន្ធហ៊ានបំពានយ៉ាងធ្ងន់ធ្ងរលើសិទ្ធស្របច្បាប់របស់ប្រជាពលរដ្ឋស្លូតត្រង់បែបនេះឡើយ៕
.jpg)
